Rajasthani Chalisa - Rajasthani Poem

🐪 🐪 राजस्थान चालीसा 🐪 🐪

उत्तरादो देख्यो दिख्खणादो देख्यो
देख्यो देश दिसावर सारा देख्यो,
पणं हीरा तो चमके है बालु रेत में।
मोतीड़ा भलके है म्हारा देस में।
रणबंका सरदार अठै ।
मोटा साहूकार अठै ।
तीखोडी तलवार अठै ।
भालां री भणकार अठै ।
साफा छुणगादार अठै ।
नितरा तीज तिंवार अठै ।
बाजर मोठ जंवार अठै ।
मीठोडी मनवार अठै ।
अन धन रा भंडार अठै ।
दानी अर दातार अठै ।
कामणगारी नार अठै ।
मुंछ्यांला मोट्यार अठै ।
पो पाटी परभात अठै ।
तारां छाई रात अठै ।
अर, तेजो तो गावे है करसा खेत में।
हीरा तो चमके है
--------------------।
झीणो जैसलमेर अठै ।
बांको बीकानेर अठै ।
जोधाणों जालोर अठे ।
अलवर अर आमेर अठै ।

Camel in desert

सिवाणों सांचोर अठै ।
जैपर सांगानेर अठै ।
रुडो रणथंबोर अठै ।
भरतपुर नागौर अठै ।
उदयपुर मेवाड़ अठै ।
मोटो गढ चित्तोड अठै ।
झुंझनूं सीकर शहर अठै ।
कोटा पाटणं फेर अठै ।
आबू अर अजमेर अठै ।
छोटा मोटा फेर अठै ।
अर, डूगरपुर सुहाणों वागड़ देस में।
हीरा तो चमके है बालु रेत में।
-------------------।
पाणीं री पणिहार अठै ।
तीजां तणां तिंवार अठै ।
रुपलडी गणगौर अठै ।
सारस कुरजां मोर अठै ।
पायल री झणकार अठै ।
चुड़लां री खणकार अठै ।
अलगोजां री तान अठै ।
घूंघट में मुसकान अठै ।
खमां घणीं रो मान अठै ।
मिनखां री पहचाण अठै ।
मिनखां में भगवान अठै ।
घर आया मेहमान अठै ।
मीठी बोली मान अठै ।
दया धरम अर दान अठै ।
अर मनड़ा तो रंगियोडा मीठा हेत में।
हीरा तो चमके है बालू रेत में।
मोतीड़ा भलके है म्हारा देस में।
--------------------------।
गौरी पुत्र गणेश अठै ।
मीरां बाई रो देश अठै ।
मोटो पुष्कर धाम अठै ।
सालासर हनुमान अठै ।
रूणीचे रा राम अठै ।
गलता तीरथ धाम अठै ।
महावीर भगवान अठै ।
खाटू वाला श्याम अठै ।
रानी सती दादी अठै ।
चारभुजा श्रीनाथ अठै ।
मेंहदीपुर हनुमान अठै ।
दधिमती री गोठ अठै ।
रणचंडी तन्नोट अठै ।
करणी मां रो नांव अठै ।
डिग्गीपुरी कल्याण अठै ।
गोगाजी रा थान अठै ।
सेवा भगती ग्यान अठै ।
अर कितरो तो बखाणूं मरुधर देस नें।
हीरा तो चमके है
-------------------------।
जौहर रा सैनाणं अठै ।
गढ किला मैदान अठै ।
हरिया भरिया खेत अठै ।
मुखमल जेडी रेत अठै ।
मकराणा री खान अठै ।
मेहनतकश इंशान अठै ।
पगडी री पहचाणं अठै ।
ऊंटां सज्या पिलाणं अठै ।
चिरमी घूमर गैर अठै ।
मेला च्यारूंमेर अठै ।
सीधी सादी चाल अठै ।
गीतां में भी गाल अठै ।
सीमाडे री बाड अठै ।
बेरयां रा शमशाणं अठै ।
तिवाडी रो देश अठै ।
ऐडी धरती फेर कठै ।
साची केवूं झूठ कठै ।
समझौ तो बैंकूठ अठै ।
अर आवो नीं पधारो म्हारा देश में।
हीरा तो चमके है बालू रेत में।
मोतीडा झलके है म्हारा देश में।
#shekhawatianchal
🙏🙏