 |
| Rajasthani Painting |
सुस्तांवण न कठै न ठांव ।
इण माया नगरी में आई,
ओळूं थांरी म्हारा गांव ॥
मिनखपणै रो काळ अठै है,
पड़्यो प्रीत रो टोटो ।
ऊपर सूं है घणो फ़ूटरो,
मन रो माणस खोटो ॥
अठै तीख रो तपै तावडो़,
अठै कठै है बड़ री छांव ।
इण माया नगरी में आई,
ओळूं थांरी म्हारा गांव ॥
अब झूरां बां धरकोटां पर,
झिरमिर पड़तो पाणी ।
लारै रै’गी सुख री घड़ियां,
करती गाणी – माणी ॥
अथै बजारां सुपना बिकग्या,
भरी भीड़ में हरया दांव।
इण माया नगरी में आई,
ओळूं थांरी म्हारा गांव ॥
अठै भीड़ में फ़िरै भटकता,
बण्या लोग बिणज्यारा ।
अठै कठै "कासम" री का’णी
हुणतै रा हुंकारा ॥
अठै है गीत कठै पिणघट रा,
अठै सुणौ कागां री कांव ।
इण माया नगरी में आई ,ओळूं थांरी म्हारा गांव ॥
0 टिप्पणियाँ