Birkha Barsi Santri - Rajasthani Poem

बिरखा बरसी सांतरी, मुरधर जागी आस ।
कोठा भरसी धान रा ,डांगर चरसी घास ।।
हाळी हळड़ा सांभिया, साथै साम्भ्या बीज ।
खेतां ढाणी घालसी , स्यावड़ गई पसीज ।।
ऊंचै धोरै बाजरी, ढळवोँ बीजूं ग्वार ।
बिच्च बिच्च तूंपूं टींढसी, मतीरा मिश्रीदार ।।
ऊंचै धोरै टापरी, साथै रैसी नार ।

Rajasthani Field

दिनड़ै करां हळोतियो, रातां बातां त्यार ।।
काचर काकड़ कीमती, मतीरा मजेदार ।
मोठ मोवणा म्होबला, धान धमाकैदार
आभै गाजी बादळी, मुरधर नाच्या मोर ।
जीया जूण खिलखिली,देख घटा घनघोर ।।
आभै चमकी बीजळी, मनड़ै जाग्यो मोह ।
बादळ राजा बरससी, मिटसी पिया बिछोह ।।
छमछम बरसै बादळी, धम धम नाचै मोर ।
धरती माथै रूंखड़ा, घालै घूमर जोर ।।
बादळ ऐड़ा ओसरया, मुरधर करियो वास ।
धरती आली सांतरी, करसां पूरी आस ।।
डेडर जीभां खोल दी, भरिया देख तळाब ।
कोयल वाणी सांचरी, मुरधर उमड़ी आब।।

खेजड़ हेटै पोढस्यां, पेड्डी टांगां पाग ।
सुपणां मीठा आवसी, आथण आसी जाग ।।
टीकड़ सिकसी राख मेँ, हांडी पकसी साग ।
ढाणी ठाठां लागसी, अब जागैला भाग ।।
कड़बी गासी गीतड़ा, ग्वार सारसी राग ।
मुरधर मजमा लागसी, जद जागैला भाग ।।
रात्यूं काढां गादड़ा, दिनड़ै डांगर ढोर।
मतीरा खावां दिनड़ै, रात नै सिट्टा मौर ।।
तिलड़ा तुरता तिड़कसी, बाजर देसी साथ ।
मोठ मरजी मानसी, जद लागांला पांथ ।।